Според податоците од системите за следење на поморскиот сообраќај, како и според иранските државни медиуми, во изминатите 24 часа успешно низ Ормутскиот Теснец поминале во просек од 20 до 30 трговски бродови и нафтени танкери.
Движењето на бродовите се одвива под строги услови и со задолжително одобрување. Бродовите мора да добијат дозвола и да ја координираат својата пловидба со Морнарицата на Корпусот на Исламската револуционерна гарда на Иран (IRGC).
Иако е забележан значителен пораст на бродскиот сообраќај, тој сè уште претставува само мал дел од обемот пред почетокот на војната, кога низ теснецот дневно поминувале повеќе од 130 бродови.
Областа и понатаму е силно милитаризирана. Бродовите кои се обидуваат да минат без координација со иранските власти биле задржувани или принудени да се вратат назад.
Од друга страна, Соединетите Американски Држави спроведуваат блокада врз иранските пристаништа и воведоа санкции против новоформираниот орган за управување со теснецот, кој Иран го формираше со цел да наплаќа транзитни такси за премин низ Ормутскиот Теснец.