Екстремните температури во Европа во текот на летото 2026 година предизвикале десетици илјади смртни случаи и сериозни економски последици. Според најновите научни процени, повеќе од 50.000 луѓе починале од последици поврзани со топлотниот бран, што го прави ова најсмртоносното лето во однос на високите температури од почетокот на 21 век.
Истражувањето, спроведено од научници од Империјал колеџ во Лондон и Лондонската школа за хигиена и тропска медицина, проценува дека во периодот од јуни до август биле регистрирани 50.391 смртен случај поврзан со топлината. Анализата опфатила 854 европски градови, во кои живее околу 40 проценти од населението во земјите вклучени во истражувањето.
Според податоците објавени од „Политико“ и други западни медиуми, бројот на смртни случаи е за 71 процент повисок во споредба со 2022 година, која дотогаш важеше за една од најсмртоносните години поради екстремните температури. За таа година, во истите градови биле проценети 29.480 смртни случаи поврзани со топлината.
Научниците проценуваат дека 32.619 од смртните случаи во летото 2026 година се поврзани со дополнителното затоплување предизвикано од човечките активности. Тоа значи дека приближно две третини од смртните случаи поврзани со високите температури може да се припишат на климатските промени.
Најголем број жртви биле регистрирани во Италија, каде што се проценува дека околу 13.300 луѓе починале поради жештините. Следуваат Франција со приближно 7.300 смртни случаи, Шпанија со 6.800, Германија со 6.300 и Обединетото Кралство со околу 4.400.
Покрај здравствените последици, високите температури предизвикале и значителни финансиски загуби. Според проценките на германската осигурителна компанија „Алијанц“, објавени во германските медиуми, економската штета за Европа во 2026 година достигнала околу 113 милијарди евра.
Најголеми загуби претрпела Италија, со проценети 28 милијарди евра. Во Германија економската штета изнесувала околу 25 милијарди евра, додека Франција се соочила со загуби од приближно 20 милијарди евра.
Резултатите од истражувањето повторно ги истакнуваат сериозните последици од екстремните температури врз здравјето на населението и економијата, како и улогата на климатските промени во зголемувањето на ризикот од смртност за време на топлотните бранови.