Учениците од Основното училиште „Гоце Делчев“ во Тетово се соочуваат со бројни предизвици додека да стасаат на училиште. Нема тротоари, непрописно паркирани возила, кучиња скитници насекаде, а и проблемот со отпадот не е за занемарување. Родителите изразуваат загриженост и бараат да се преземат мерки, пред, како што велат, да дојде до фатални последици.
Прашавме во општина Тетово, од каде велат дека за сообраќајот во градот е надлежен Секторот за внатрешни работи, велат родителите.
-Безбедноста во сообраќајот не е во надлежност на општина Тетово. За ова прашање одговорност сносат директно учениците во сообраќајот и СВР-Тетово, бидејќи сообраќајните знаци се веќе поставени од страна на општината, велат од општина Тетово.
А од СВР-Тетово уверуваат дека нивните тимови постојано вршат патроли, но како што објаснуваат, проблемот е во несоодветната инфраструктура во тој дел од градот.
-Согласно надзорите на СВР-Тетово, круцијален проблем за условите за кои реагираат граѓаните, а кои го спомнавте вие, е несоодветната инфраструктура во тој дел од градот, која не е димензионирана и не соодветствува со моменталната фреквенција на возилата и луѓето, велат од СВР Тетово.
И додека институциите си ја префрлаат топката, родителите најавуваат дека доколку не бидат преземени мерки, ќе го блокираат патот во знак на протест.