Над 1,5 милиони патници се соочија со хаос на американските аеродроми во петокот, откако технички проблем во системите за комуникација на контролата на летање ги принуди властите да ги прекинат сите летови во САД во период подолг од четири часа.
Забраната беше воведена од безбедносни причини, по она што властите го оценија како вонредни околности. Проблемите најпрво се појавиле на аеродромите во Бостон, Њујорк и Чикаго, а потоа се прошириле низ целата земја.
Според министерот за транспорт, Шон Дафи, преоптоварувањето со податоци предизвикало пад на неколку рутери, што влијаело врз радиофреквенциите што се користат за комуникација меѓу контролорите на летање и пилотите.
Американските власти засега ја исклучуваат можноста за сајбер-напад. Министерот за внатрешна безбедност, Марквејн Мулин, изјави дека не се утврдени докази за надворешно мешање во комуникациските системи.
Говорејќи од Белата куќа, Мулин се обиде да ја смири јавноста, нагласувајќи дека ситуацијата нема никаква поврзаност со терористичките напади од 11 септември 2001 година.
Тој исто така негираше дека инцидентот е поврзан со неодамнешните прекини во услугите на „Мајкрософт“, кои во последните 48 часа погодија различни системи.
И покрај укинувањето на забраната, се очекува да биде потребно време за враќање во нормала. Според објавените податоци, откажани се над 9.000 летови, додека илјадници други се соочиле со доцнења.
Шон Дафи предупреди дека не може да гарантира дека ваква ситуација нема да се повтори. Тој информираше дека од Конгресот побарал 50 милијарди долари за модернизација на инфраструктурата и системите за контрола на воздушниот сообраќај, кои веќе подолго време се сметаат за застарени.
Прекин од вакви размери не бил регистриран од 2023 година, кога технички проблем во системот за известување на пилотите ги принуди властите привремено да ги суспендираат домашните летови во САД.
Слична ситуација, според обемот на прекинот на воздушниот сообраќај, била забележана и на 11 септември 2001 година, по терористичките напади врз Кулите близначки.