Поморските служби за следење на пловидбите утрово добија нови извештаи за напад врз брод во Ормускиот теснец, што дополнително ја зголеми загриженоста за заканите по глобалното снабдување со енергенси, откако Саудиска Арабија привремено затвори важен нафтовод.
Британската агенција UKMTO, поврзана со морнарицата, соопшти дека добила извештај за проектил што погодил брод додека се движел низ теснецот. По нападот избувнал пожар, поради што локалните власти го евакуирале екипажот, соопшти агенцијата во неделата.
Извештајот на UKMTO дојде еден ден откако Саудиска Арабија соопшти дека привремено го затворила својот нафтовод Исток-Запад како мерка на претпазливост по нападот со дрон, за кој и Багдад и Ријад рекоа дека потекнувал од Ирак, каде што дејствуваат милиции поддржани од Иран.
Продолжувањето на нападите во пошироката војна на Блискиот Исток би можело дополнително да ги зголеми цените на енергенсите, откако минатата недела цената на суровата нафта „Брент“ повторно се искачи над 100 долари за барел.
Нафтоводот Исток-Запад, долг 1.200 километри, кој минува низ Арапскиот Полуостров, во изминатите шест месеци беше главната излезна рута за глобалното снабдување со нафта од Блискиот Исток, додека Ормускиот теснец во голема мера е затворен поради војната.
Низ него се транспортирале од 4 до 5 милиони барели дневно, што претставува од 4 до 5 отсто од глобалното снабдување, со што Саудиска Арабија беше поштедена од најголемиот дел од нарушувањата што ги погодија другите извозници на нафта и гас од Заливот.
Засега никој не презел одговорност за нападите врз нафтоводот. Сателитските снимки покажаа црн чад што се издигнува од областа на нафтоводот јужно од Медина. Саудиското Министерство за надворешни работи соопшти дека во нападот имало повредени и причинета е материјална штета, која се проценувала, но не даде детали за влијанието врз извозот.
Американскиот претседател Доналд Трамп, кој престојува во Ирска за да присуствува на голф-турнир во едно од неговите одморалишта, изјави дека за нападот веројатно е одговорен Иран.
Од друга страна, иранските државни медиуми објавија дека рано во неделата бил погоден ирански трговски брод во близина на јужниот брег на земјата, при што едно лице загинало, а три биле повредени. Не беа објавени дополнителни детали.