Министерството за здравство презентираше построги мерки за следење на работата на здравствените работници, со цел обезбедување ефикасна работа и транспарентност.
Министерот Азир Алиу најави воведување нов систем за евиденција на работното време преку отпечаток од прст и нагласи дека ќе се преземат законски мерки против институциите и директорите кои нема да ги почитуваат правилата.
Тој истакна дека имаат детектирано колку здравствени работници работат надвор од редовното работно време, колку часови работат и дали тие институции се во согласност со законските ограничувања, бидејќи според него, многу доктори работат во приватни клиники, а примаат плата од државата за истото работно време.
„Со овој закон, ги регулираме неколку аспекти: прво е системот ’tack and trace‘ – дигитално следење на целиот процес“, изјави министерот за здравство, Азир Алиу.
Следниот предлог-закон што го презентираше Алиу е за лековите, како дел од поширока реформа на здравствениот сектор. Според него, новиот закон има за цел да го модернизира системот на лекови и да го усогласи со европските стандарди, со фокус на подобрување на квалитетот на третманот и зголемување на безбедноста на пациентите. Законското решение предвидува побрзи процедури за одобрување и регистрација на лековите, со скратување на времето за нивна достапност, како и воспоставување систем за следење на снабдувањето и спречување на можен недостиг. Воведени се и електронски системи за следливост и анализа на потрошувачката, потенцира Алиу.
„Со овој закон го зајакнуваме контролата на квалитетот и безбедноста на лековите во сите фази, воведуваме побрзи и поефикасни процедури за обезбедување на нови терапии во нашата држава, го подобруваме системот за фармако-вигиланција и следење на несакани ефекти преку воспоставување на организирано собирање, следење и анализа на сигнали за безбедност од употребата на лековите во државата“, изјави министерот за здравство, Азир Алиу.
Предлог-законите ќе бидат достапни во Националниот електронски регистар на правилници (ЕНЕР) од понеделник следната недела, каде јавноста ќе може да поднесе коментари и предлози.