Градоначалникот на Нови Сад, Милан Ѓуриќ, вечерва изјави дека до сега 13 лица загинале при уривање на настрешницата на железничката станица и најави дека градот ќе ги сноси трошоците за погребот на жртвите и на тој начин ќе се обиде да им помогне на семејствата колку што е можно.
„Како град ги ставивме сите наши ресурси за спас“, изјави градоначалникот за Пинк и додаде дека се надева дека нема да има повеќе жртви под урнатините.
Тој потсети и дека во Нови Сад е прогласена тридневна жалост.
„Што да правиме, ова е невидена трагедија што го снајде Нови Сад“, рече Ѓуриќ.
И ги потврди претходните информации дека за разлика од станицата, настрешницата што паднала не била реконструирана.
„Како некој да притиснал копче, настрешницата паднала врз луѓето“, изјави градоначалникот на Нови Сад.