Според професорот Јетон Шасивари, кој е и член на работната група што работи на изнаоѓање решение за правосудниот испит, предложеното решение е во согласност со Уставот, законите и европските стандарди и ја одразува заложбата на студентите од трите правни факултети со настава на албански јазик испитот да можат да го полагаат на својот мајчин јазик.
„Предложеното решение предвидува реално, оптимално, уставно и законско решение, усогласено со европските стандарди. Тоа одговара на барањата на студентите од трите правни факултети со настава на албански јазик. Предлогот ја отсликува нивната клучна заложба – правосудниот испит да се полага на албански јазик.“, порача Јетон Шасивари.
Шасивари се осврна и на нацрт-верзијата на законот за правосуден испит, според која теоретскиот дел би се полагал на албански јазик, додека практичниот дел би се полагал на македонски јазик. Тој истакна дека ова не претставува половично решение, туку комбиниран модел.
„Ова не е половично решение, ниту пак некакво хибридно решение. Студентите не бараат половични решенија. Апсолутно не станува збор за тоа. Ова е комбиниран модел. Не е ниту целосно решение, ниту креативно решение, туку реално, оптимално, уставно и законско решение, усогласено со европските стандарди.“, порача Јетон Шасивари.
Тој објасни дека главната пречка за целосно спроведување на испитот на албански јазик е практичниот дел, бидејќи материјалите и предметите што се користат во судските постапки се достапни само на македонски јазик.
„Ако теоретскиот дел може да се полага на албански јазик, зошто да не може и практичниот? Проблемот е во предметите што се користат во судовите и кои се само на македонски јазик. Но, важно е што по 35 години, кога овој испит никогаш не бил администриран на албански јазик, сега конечно се отвора можност за тоа.“, вели Јетон Шасивари.
Шасивари појасни дека не станува збор за носење нов закон, туку за измени и дополнувања на постојниот Закон за правосуден испит.