ИНДОНЕЗИЈА воведе построги визни правила насочени кон справување со странските влијателни лица и креатори на содржини кои работат на Бали со туристички визи. Според новите правила, луѓето кои објавуваат содржина на интернет со цел да заработат пари, спонзорираат или промовираат производи ги кршат условите за нивниот туристички престој – дури и ако ги објавуваат откако ќе ја напуштат земјата, објавува „Њујорк пост“.
Индонезиските власти го засилија надзорот врз странците на Бали, а имиграциската патрола „Дарма Девата“ веќе притвори десетици лица за кршење на визните правила. Службениците, исто така, ја следат активноста на социјалните медиуми и посетуваат популарни места за собирање странци, како што се Кангу и Убуд, објави „Бали Инфо“.
Прекршителите се соочуваат со казни, депортација и можност за трајна забрана за влез во Индонезија. Министерството за надворешни работи на Австралија ги предупреди патниците преку својата платформа SmartTraveller дека мора да имаат соодветна работна виза за да вршат каков било бизнис на Бали.
Едно од главните прашања меѓу патниците е што точно се смета за работа. Индонезиската имиграциска служба разјасни дека работата со туристичка виза е една од најчестите причини зошто странците се депортираат од Бали.
„Не мора секогаш да биде платена работа. Имиграциските власти можат да ја земат предвид целта на престојот, видот на активноста и дали зад неа стои некаква економска корист“, рекоа тие.
Работата може да се смета за различни активности, од професионални услуги како што се фотографија и шминкање до промоција на производи и рекламирање на социјалните медиуми. Правилата важат и за работа што не е директно платена, но носи некоја друга корист за лицето, како што се бесплатен сместување, производи или соработка со брендови.
„Нелегално е да се работи, да се спроведува истражување или да се волонтира додека сте во земјата со туристичка виза. Осигурајте се дека имате соодветна виза за вашето патување“, предупредија властите.
Индонезиските власти велат дека построгите контроли не се насочени кон туристите, туку кон оние кои користат туристички визи за деловни активности.
Фелусија Сенгки Ратна, раководител на регионалната канцеларија на Директоратот за имиграција за Бали, изјави дека проверките се спроведуваат за да се зачува безбедноста и стабилноста на островот. „Овој надзор се спроведува сеопфатно за да се одржи безбедноста и стабилноста“, рече таа.
Затоа властите им советуваат на инфлуенсерите, дигиталните номади и другите креатори на содржини да проверат пред да пристигнат на Бали дали нивната виза одговара на активностите што планираат да ги извршат.