Новите прогнози на Меѓународниот монетарен фонд (ММФ) укажуваат на тешка иднина за светската економија, обележана со слаб раст, ескалација на трговските тензии и висока задолженост, изјави директорката на ММФ Кристалина Георгиева.
– Не сум премногу песимист, бидејќи ако го погледнеме трендот на светската економија, точно е дека може да биде подобро, но и многу полошо – рече Георгиева.
Сè поизразениот протекционизам и зголемените трговски ограничувања и штетат на глобалната економија, го ограничуваат трговскиот раст и ја кочат и онака ослабената светска економија, рече Георгиева, која овој месец го започна својот втор петгодишен мандат на чело на ММФ.
Меѓу ретките добри вести таа ги издвои ублажувањето на инфлацијата и враќањето на стабилните цени, заедно со уредното подобрување на состојбата на пазарот на труд во САД и Европа.
САД не се во рецесија, иако каматните стапки во последните три циклуси предизвикаа значително слабеење на економската активност, а стапката на невработеност се очекува да остане релативно ниска, рече таа.