Централната изборна комисија ги објави конечните резултати од изборите. Членовите на Комисијата ги усвоија листите на кандидати на сите политички партии.
Претседателот на Централната изборна комисија, Крешник Радониќи, соопшти дека по оваа одлука, кандидатите имаат право да поднесат жалба на објавените резултати во рок од 48 часа, почнувајќи од денес во 12:00 часот, а рокот истекува во понеделник во 12:00 часот.
Според конечните резултати, движењето „Самоопределување“ (Lëvizja Vetëvendosje) е прва политичка сила со освоени 53 пратенички места.
Демократската партија на Косово (PDK) ќе има 22 пратеници во новиот парламентарен состав, додека Демократскиот сојуз на Косово (LDK) обезбеди 18 мандати.
Алијансата за иднината на Косово (AAK) ќе биде претставена со седум пратеници.
По објавувањето на конечните резултати од Централната изборна комисија, се очекува да започнат процедурите за нивна сертификација, а потоа и чекорите за формирање на новите институции.