Осомничениот за пукањето на церемонијата во Вашингтон, каде што требаше да се обрати американскиот претседател Доналд Трамп, беше обвинет за обид за атентат, како и за поширок заговор насочен кон високи владини функционери.
Федералната обвинителка на округот Колумбија, Џанин Пиро, ги објави обвиненијата на прес-конференција на 27 април – два дена по нападот на вечерата на Здружението на дописници од Белата куќа.
Таа рече дека се очекува осомничениот, Кол Томас Ален, да се соочи со дополнителни обвиненија додека истрагата продолжува.
„Тоа се само три обвиненија вклучени во жалбата… ќе има и други обвиненија како што напредува истрагата“, рече Пиро.
„Но, да нема сомнение, ова беше обид за атентат врз претседателот на Соединетите Американски Држави“, додаде таа.
На 25 април, 31-годишниот Ален од Калифорнија отвори оган од пушка кон обезбедувањето, предизвикувајќи паника додека претседателот Трамп и првата дама Меланија Трамп брзо избегаа од блиската соба без да бидат повредени.
Агенти на американската тајна служба го отстрануваат претседателот Доналд Трамп од просторијата откако еден од обезбедувачите беше застрелан пред банкет салата во Белата куќа, 25 април.
Официјалните лица изјавија дека еден од обезбедувачите бил застрелан додека Ален се обидувал да помине преку контролниот пункт, но не бил сериозно повреден бидејќи носел панцир.
Според обвинителот Пиро, истражителите веруваат дека тој имал намера да „застрела што е можно повеќе високи владини функционери“.
На истата конференција, вршителот на должноста државен обвинител Тод Бланш рече дека властите обезбедиле манифест за кој се верува дека осомничениот го испратил до своето семејство.
Според него, јасно е дека главната цел бил претседателот Трамп, додека другите мотиви ги истражуваат ФБИ и агенциите за спроведување на законот.
Според судските документи, Ален резервирал соба во хотелот каде што се одржувала вечерата на 6 април и патувал од Калифорнија до Вашингтон со воз.