Патот од Кичево, односно од селото Извор до Дебар, во должина од 19 километри, сѐ уште не е завршен, бидејќи за време на градежните работи компанијата наишла на големи свлечишта. Трасата е пробиена, голем дел од патот е асфалтиран, но и понатаму има одрони на неколку делови од патот.
„Се наоѓаме на регионалниот пат Кичево–Дебар, поточно од селото Извор во Кичевско до Дебар. Изградбата на овој пат започна пред неколку години и, како што може да се види, трасата е пробиена, а голем дел од патот е асфалтиран. Сепак, иако сѐ уште не е завршен, жителите веќе почнаа да го користат. Да потсетиме дека патот е опасен поради големите свлечишта на неколку негови делови“, изјави новинарката на ТВ21, Салије Садику-Пињоли.
За патот да биде завршен и целосно функционален, потребно е да се изградат потпорни ѕидови.
За таа цел, компанијата побарала дополнителни средства од Јавното претпријатие за државни патишта, но тие сѐ уште не се одобрени.
„Во однос на патот Извор–Гари, во моментов нема ништо ново. Дополнителните средства за потпорните ѕидови сѐ уште не се одобрени од страна на Јавното претпријатие за државни патишта. Информиран сум дека се очекува овие средства наскоро да бидат обезбедени, но не можам да кажам колку брзо ќе се случи тоа“, изјави Раде Трајковски.
За ова побаравме став и од Јавното претпријатие за државни патишта, но оттаму сѐ уште немаме добиено одговор.