Нема зголемување на бројот на мигранти на јужната граница, но нашава земја се подготвува за било каква состојба. Ова го изјави шефот на државата и врховен командант Стево Пендаровски по посетата во Гевгелија на припадниците на полициските и армиските сили кои ја обезбедуваат нашата јужна граница, како и на Транзитниот центар каде што се врши регистрација на мигранти.
„До овој момент нема никакво зголемување на бројката на илегални мигранти освен она што е вообичаено за овој период од годината но и во други години. Значи нема никаква ниту назнака дека може да биде во наредниве денови некаков прилив на бран на мигранти да оди кон нашата територија и јасно е дека најголемиот притисок е на грчко-турската граница. Сите надлежни органи се тука и се будни, анализираат и разменуваат информации, така што практично не можам да видам ситуација во која што ќе бидеме изненадени“, истакна Стево Пендаровски.
За зголемувањето на безбедноста на јужната граница говореше и министерката за одбрана Радмила Шекеринска која истакна дека веќе се подготвуваат за сите можни сценарија и дека веќе од вчера бројот на полициските и армиските сили се зголемени.
„Вие знаете дека на нашата граница се присутни околу 130 странски полицајци, полицајци на земји членки на Европската унија и ние вчера на Управувачкиот комитет одлучивме да побараме од сите земји да го продолжат тој ангажман.. Согласно ситуацијата на терен и нашата комуникација со колегите во регионот па и со Фронтекс ќе ги носиме одлуките, меѓутоа од вчера бројките се подигнати“, додава Радмила Шекеринска.
Во меѓувреме нема промени на турско-грчката граница, напнатоста и натаму расте. Веќе е регистирана и првата жртва откако вчера дете од Сирија се удави кога чамецот во кој се превезуваа 47 мигранти се преврте. Грците се повеќе го губат трпението и употребуваат брутални мерки за да ги одвратат мигрантите кои на секој начин се обидуваат да влезат во Грција.
Во текот на денов во посета на грчко турската граница е и претседателката на Европската комисија Урсула вон дер Лајен, потоа претседателот на Европскиот совет Шарл Мишел, на европскиот парламент Давид Сасоли, како и хрватскиот премиер Андрен Пленковиќ од име на земјата претседавач со Европската унија.