Повеќе од 60 јавни личности, кои пред две недели испратија апел за одговорност до опозициските партии, подготвија предлог Договор за одговорна Србија и го доставија до опозициските партии со демократска и граѓанска ориентација, јави дописникот на МИА од Белград.
Потпишување на Договорот е закажано за четврток 17 февруари на состанок на кој покрај иницијаторите ќе учествуваат Горан Марковиќ, Весна Ракиќ Водинелиќ, Дубравка Стојановиќ, Тамара Трипиќ, Раде Радовановиќ, Александар Баучал, Драгољуб Бакиќ и Дејан Атанацковиќ.
Според соопштението, поканата за потпишување на Договорот е испратена до партиите од демократската опозиција, пред се до оние кои јавно и недвосмислено го поддржаа Апелот: Коалицијата Мораме, Партијата за слобода и правда (ССП), Движењето на слободни граѓани (ПСГ), Граѓанскиот демократски форум, Нова партија, Демократската партија (ДС), Народна партија(НС) и Социјалдемократската партија.
-Поаѓајќи од фактот дека на Србија не и е потребна само промена на власта, туку и преземање одговорност за нови политики кои подготвено ќе се соочат со наталожените проблеми, со апсолутна поддршка за излагање на опозицијата во неколку програмски колони и уверување дека политички и вредносно средните колони имаат големи шанси за изборен успех, ние, долупотпишаните, сметаме дека е потребно усогласување на принципите кои стојат над специфичните програмски и теснопартиски цели, а кои суштински ги обединуваат сите демократски сили во борбата против единствениот противник – владејачкиот режим, се навдува во соопштението.
Апелот до партиите на проевропската демократска опозиција беше испратен на 27 јануари, а потоа беше потпишан од 51 јавна личност, а нивниот број во меѓувреме се зголеми.