По повеќе од две години, повторно е поднесено барањето до Министерството за правда за организирање на стручните испити и на албански јазик. Барањето го поднел иницијаторот, студентот Мевлан Адеми, заедно со претседателот на Студентскиот парламент на ЈИЕ Универзитетот, Бесјан Реџепи.
Овојпат, покрај правосудниот испит, барањето ги опфаќа и испитите за нотари, извршители и другите државни испити кои, според студентите, и понатаму се спроведуваат само на македонски јазик. Тие бараат примена на Законот за употреба на јазиците и еднакви можности за албанските студенти во процесот на образование, сертификација и вршење на професијата.
Според Адеми, институциите имаат обврска да го спроведуваат законот и да ја гарантираат употребата на албанскиот јазик во соодветните постапки. Барањето доаѓа повеќе од две години по првото поднесување, а студентите очекуваат овојпат Министерството за правда да преземе конкретни чекори.