Пратеничката група на Европскиот фронт достави до Собранието предлог-закон за измени и дополнувања на Законот за правосуден испит. Пратеничката од ДУИ, Рина Ајдари, оцени дека одбивањето испитот да се полага и на албански јазик не само што ја нарушува јазичната и правната еднаквост, туку директно ги подрива темелите на уставниот поредок и меѓуетничкиот соживот. Според нив, министерот за правда се става над Уставот, над законот, над Владата и над сите други институции во државата, со што сериозно ги нарушува принципите на правната држава.
„Поради ова, ние како пратеничка група денеска доставивме во процедура предлог-закон за измени и дополнувања на Законот за правосудниот испит, со барање испитот да се спроведува и на албански јазик. Доставивме и предлог-закон за измени и дополнувања на Законот за нотарство, како и предлог-закон за измени и дополнувања на Законот за извршување“, изјави Рина Ајдари од ДУИ/ЕФ.
Првиот заменик-претседател на Владата, Беким Сали, запрашан за одбивањето на Министерството, изјави дека Законот за правосудниот испит, кој е во сила од јануари 2020 година, има недостатоци, бидејќи не прецизира на кој јазик треба да се полага испитот. Сали истакна дека го поддржуваат барањето на студентите, Албанци по право, испитот да може да се полага и на албански јазик.
„Законот има недостаток бидејќи не ја прецизира јазичната одредба на која треба да се полага правосудниот испит. Ќе се обидеме овој недостаток да го поправиме или да го прецизираме, бидејќи Министерството за правда не е подготвено да го почитува Уставот на државата, кој подразбира дека сè што е над 20 проценти од населението мора да го има почитуван мајчиниот јазик. Тоа значи дека албанскиот јазик треба да биде службен и дека секој правник или дипломиран правник има право правосудниот испит да го полага на својот мајчин јазик – на албански. Овде уште еднаш го повторувам ставот на ВЛЕН дека сме за ова барање“, изјави Беким Сали, прв заменик-претседател на Владата.
Народниот правобранител отвори предмет во врска со одбивањето на барањето на студентите и најави дека случајот ќе го разгледува и по сопствена иницијатива, преку анализа на Законот за употреба на јазиците и постапките на Министерството за правда. Од Канцеларијата на Народниот правобранител е упатен повик до сите лица кои поднеле барања до Министерството да се јават и кај Народниот правобранител.
Во поддршка на иницијативата на студентите, амбасадорот на Албанија во Македонија, Денион Меидани, на социјалните мрежи сподели фотографија со натписот „ЗБОРУВАЈ АЛБАНСКИ, О ТИ!“.
Инаку, од Министерството за правда одбивањето на барањето на студентите го образложија со објаснување дека правосудниот испит не може да се полага на албански јазик бидејќи служи како тест за активно познавање на македонскиот јазик.