Естонскиот претседател Алар Карис изјави денеска дека Европската унија треба сериозно да размисли за воведување целосно трговско ембарго против Русија.
„Европската унија треба дополнително да ја унапреди независноста и да го прекине целиот увоз на руска енергија во ЕУ. Целосното трговско ембарго кон Русија треба дури и сериозно да се разгледа“, рече тој на платформата „Икс“.
„Ова целосно ќе стави крај на енергетската зависност на балтичките земји од Русија и ќе обезбеди Русија никогаш да не може да ја користи енергијата како оружје против нас“, напиша Карис.
Литванија, Летонија и Естонија во саботата ги исклучија своите електроенергетски системи од електроенергетските мрежи на Русија и Белорусија, а денеска ги синхронизираа тие системи со континентална Европа.