Prishtina mund të mbetet pa ujë, asfaltuesit kanë dëmtuar kabllot​

Për shkak të dëmtimit të kabllove të energjisë elektrike në stacionin e pompave në Besi, nga kontraktori i Komunës së Prishtinës, Prishtina sot rrezikon të mbetet pa ujë të pijshëm, njoftoi para pak minutave Kompania e Ujësjellësit Rajonal “Prishtina” sh.a.
“KUR ‘Prishtina’-sh.a. njofton të gjithë konsumatorët e qytetit të Prishtinës, ata të cilët furnizohen me ujë nga sistemi i Batllavës, e që janë gjithsej 70% e konsumatorëve të këtij qyteti, se sot mund të rrezikojnë të mbesin pa ujë gjatë gjithë ditës.
Kjo vjen si pasojë e dëmtimit të kabllove të energjisë elektrike në Stacionin kryesor të pompave në fshatin Besi, nga kontraktorët e Komunës së Prishtinës që janë duke punuar në asfaltimin e rrugëve, e që është hera e dytë që po i dëmton kabllot e energjisë e që realisht Prishtina rrezikon të mbetet pa ujë.
Kërkojmë nga Komuna e Prishtinës që kontraktorëve të tyre t’u sugjerojnë që të jenë shumë më të përgjegjshëm.
Po ashtu , mbrëmë pasi që ka filluar prodhimin Fabrika e Badocit, kemi pasur probleme me rrjetin brenda qytetit të Prishtinës, me ç’rast ka ndodhur një pëlcitje e gypit me diamet ër fi 300 mm në rrugën “Ismail Dumoshi” ku punëtorët e Ujësjellësit që nga mbrëmë janë në vendin e ngjarjes dhe pritet që shumë shpejtë të sanohet.
Si shkak i këtij dëmtimi, disa lagje që furnizohen me ujë nga sistemi i Badocit janë pa ujë deri në sanimin e gjendjes”, thuhet në njoftimin e Kompanisë së Ujësjellësit “Prishtina”