Еден од најпознатите симболи на старо Скопје, хотелот „Бристол“ во центарот на главниот град, доби нов сопственик. АД „Македонијатурист“ го продаде објектот, а според податоците од Агенцијата за катастар на недвижности, како нов сопственик е запишана компанијата ГМ Проперти.
Вредноста на купопродажбата засега не е објавена. Можно е сумата да биде позната во следниот период, доколку биде објавена како информација преку Македонската берза.
ГМ Проперти е компанија основана во октомври 2024 година за услужни дејности. Според достапните податоци, фирмата во текот на минатата година немала пријавени приходи, но евидентирана е финансиска изложеност преку банкарско кредитирање од околу пет милиони евра.
Единствен сопственик на компанијата во моментов е Емил Кратовалиев, член на Управниот одбор на осигурителната компанија „Уника“. Како основач заедно со Кратовалиев бил наведен и Зоран Антиќ, сопственик на „МГ Фешн“ и акционер во „Македонијатурист“, но тој излегол од сопственичката структура минатата година.
Продажбата на „Бристол“ следува по одлуката на „Македонијатурист“ да ги отуѓи хотелите „Бристол“ и „Јадран“, познат како „Арапска куќа“, како и дополнителен недвижен имот во централното градско подрачје.
Одлуката била донесена на седница на Собранието на акционери одржана на 22 мај, а информацијата била објавена преку Македонската берза.
Хотелот „Бристол“ е еден од најстарите сочувани хотелски објекти во Скопје. Изграден е во 1923 година по иницијатива на познатите скопски трговци Атанас (Ташко) и Ристо Караџа, а свечено бил отворен на 24 април 1924 година.
Објектот се наоѓа на улицата „Македонија“, во близина на старата Железничка станица, а низ децениите бил место каде престојувале патници, трговци, дипломати и јавни личности.
Со своите 33 соби, ресторан и придружни содржини, „Бристол“ со години бил еден од препознатливите центри на скопскиот урбан и боемски живот.
Продажбата на хотелот отвора прашања за неговата иднина, особено поради историското значење на објектот и неговата улога во културното наследство на градот.