Жителите на населеното место Пресил, крушевско протестираа против поставувањето на крстот висок 30 метри во нивното село.
Велат дека е провокација, бидејќи, како што додаваат, сите жители во селото се од исламска вероисповед. Крстот се обиделе да го постават жителите од околните села од македонската заедница.
„Во селото Пресил живеат 100% Албанци и муслимани. Соседните села се речиси сите македонски и немаа ли друг избор да постават 30-метарски крст во некое нивно село, туку го избраа селото Пресил. Во Пресил има црква, не знам колку е стара. Но, тие решија да ја обноват, користејќи ја за манифестации. Почнаа да ја злоупотребуваат нашата добрина што ние ја чувавме нивната црква да не се оштети, да не биде украдена“, вели Џемаил Фејзулаху.
Ова е местото каде беше предвидено да биде поставен крст, без дозвола на надлежните институции. Од Општина Крушево велат дека засега поставувањето на крстот е стопирано, со цел да се види дали надлежните ќе издадат дозвола за тоа.
„Во населеното место Пресил, општина Крушево, имаше обид за поставување на крст во дворот на постоечката православна црква. Постапката е прекината заради тоа што не е добиена дозвола, од аспект на урбанизам, и институциите мора да го имаат последниот збор. Исто така, населените места во општина Крушево отсекогаш негувале добра соработка и комуникација, но овојпат тоа изостана. Во овој случај, не постоеше никаква комуникација и сограѓаните од с. Пресил не беа информирани. Тоа предизвика револт кај нив“, посочи Сотир Габелоски.
Од општина Крушево ги повикуваат жителите во иднина да продолжат со добрата меѓусебна комуникација и да се залагаат за решавање на други проблеми од областа на инфраструктура и економија.
Фазиле Халили