Во гостиварскиот регион е регистрирана тешка работна несреќа во која животот го загуби 48-годишен маж од Тетово, за време на изведување градежни работи на приватен објект.
Како што информираат надлежните, инцидентот бил пријавен на 21 април 2026 година во Полициското одделение Галате, по што интервенирале полициски и други служби. Според податоците од СВР Тетово, несреќата се случила во селото Градец, при изведување работи на кран на приватна куќа.
Првичните информации укажуваат дека при обид да се одглави заглавена сајла на кран, дошло до пукање на метален дел од конструкцијата. Одделениот дел го погодил работникот И.А. во пределот на главата, при што тој се здобил со смртоносни повреди.
На местото на настанот веднаш пристигнала екипа на Итната медицинска помош, но лекарите можеле само да ја констатираат смртта.
Увид извршиле јавен обвинител и полициски екипи, а по наредба на обвинителството телото на починатиот е дадено на обдукција, со цел целосно расчистување на околностите под кои се случила несреќата.