Вечерва, по седницата на Извршниот комитет на ВМРО-ДПМНЕ, официјално ќе биде објавена реконструкцијата на Владата.
Веќе е познато дека ВЛЕН ќе раководи со три нови министерства – Министерството за правда, Министерството за култура и Министерството за односи меѓу заедниците.
Но, кои ќе бидат новите министри? ТВ21 неофицијално дознава дека Јетон Шасивари ќе биде предложен за министер за правда. Запрашан за ова име, копретседателот на ВЛЕН, Изет Меџити, не негираше.
„Најпрвин, можеме да оцениме дека тој е еден од најдобрите професионалци во областа на правото во земјата. Припаѓа на новата генерација, исклучителен академик, никогаш немал амбиции да влезе во извршната власт, ниту пак сме разговарале на таа тема. Но, самиот факт што ВЛЕН го презема Министерството за правда доведе и аналитичарите и јавноста да размислуваат кој би можел да биде министер. Нормално, вниманието се насочува кон луѓе од оваа област и така се појави името на Јетон Шасивари. Значи, тоа не е негово барање и нема ништо конкретно, но дали е човек од оваа област и од тој ресор – да“, вели Изет Меџити од ВЛЕН.
Како друго име за нов министер се споменува Агон Ферати, кој би можел да биде предложен за министер за односи меѓу заедниците.
„Има повеќе имиња, но сè уште ништо не е затворено. Ако зборувам за тоа, би можел да им наштетам на разговорите. Станува збор за прашање за дискусии и анализи, затоа не сакам да им наштетам. Но, и тој е личност која во рамките на ВЛЕН заслужува да добие шанса“, вели Изет Меџити од ВЛЕН.
За министер за култура се споменува дека ќе биде Седат Сулејмани, кој досега ја извршуваше функцијата заменик-министер.
За овие ресори, ВЛЕН се откажа од здравството, социјалната политика и од функцијата заменик-претседател на Владата задолжен за добро владеење.
Освен овие промени, се очекуваат измени и во Министерството за образование и Министерството за земјоделство.