Нутриционист и медицински астролог открива кои намирници, според астролошките толкувања, треба да се најдат во вашата кошничка додека трае ретроградниот Меркур (до 23 јули). Ако и вие сте слушнале дека луѓето ги обвинуваат планетите за лошите одлуки, малерот или откажувањето од диетата, станува збор за астрономски феномен што се случува неколку пати годишно. Иако не постојат научни докази дека тој влијае на секојдневниот живот, астролозите го тврдат спротивното.
Влијание врз семејството и комуникацијата
Астрологот Инбал Хонигман смета дека во текот на овој ретрограден Меркур најмногу проблеми би можела да предизвика технологијата. Телефоните, вели таа, би можеле сами од себе да се рестартираат, пратките да завршуваат кај погрешни соседи, а интернет-врската често да прекинува и да создава дополнителен стрес.
Бидејќи Меркур моментално се наоѓа во знакот Рак, Хонигман верува дека најмногу ќе бидат погодени семејните односи и комуникацијата со блиските луѓе.
„Тоа значи дека безопасните разговори полесно ќе се сфаќаат лично, а деловните разговори би можеле да станат поемотивни отколку што треба“, вели таа. „Кога ретроградниот Меркур е во Рак, наместо личен раст, тој носи повеќе емоции и привремено ги нарушува односите, но само до 23 јули.“
Што да јадете за повеќе мир и рамнотежа?
За да им помогне на луѓето да останат смирени и прибрани, нутриционистката и медицински астролог Кира Садерленд сподели листа на намирници и напитоци кои ги препорачува во овој период.
„Без разлика дали луѓето веруваат во ретрограден Меркур или едноставно го користат како објаснување за стресните периоди, тој одразува нешто многу човечко – потребата да се чувствуваме посмирено кога животот станува хаотичен или непредвидлив“, вели таа. Таа додава дека малите секојдневни навики поврзани со исхраната, спиењето и рутината можат да ни помогнат да се чувствуваме подобро.
Според Садерленд, постојат неколку клучни намирници кои во овој период треба да се конзумираат почесто:
- Овошје и зеленчук: Таа препорачува сладок компир (батат), тиква, боровинки, круши и спанаќ. Бататот ги поддржува дигестијата и имунитетот, додека тиквата е богата со витамин А. Иако боровинките, спанаќот и крушите годинава се најдоа на листата „Нечисти дванаесет“ (намирници со повеќе остатоци од пестициди), Садерленд и понатаму ги препорачува за овој период.
- Протеини: На листата се лососот, јајцата и семките од тиква. Освен што подолго време даваат чувство на ситост, протеините помагаат во варењето на храната и полесното одржување на здрава телесна тежина.
- Напитоци: Чај од камилица или нане, супа од коски (бујон) и кефир. Кефирот е ферментиран млечен напиток кој придонесува за здравјето на цревниот микробиом и помага во регулација на холестеролот, крвниот притисок и шеќерот во крвта.
- Останати препораки: Садерленд смета дека во овој период можат да помогнат и оревите, кимчито (традиционален корејски ферментиран зеленчук кој е богат со пробиотици), магнезиумовите соли за бања, па дури и миризливите свеќи.
Пет златни совети за полесно менаџирање на стресот
1. Не го прескокнувајте појадокот
Нутриционистката препорачува денот да го започнете со хранлив појадок богат со протеини, како што се јајца, јогурт или овесна каша. Ваквите оброци помагаат во одржувањето стабилно ниво на енергија во текот на утрото.
2. Не се откажувајте од „храната за утеха“
Ако ве фати желба за омилените јадења, нема потреба целосно да ги исфрлите. „Балансирајте ја омилената храна со похранливи опции како супи, печен зеленчук и оброци богати со протеини за да се чувствувате сити и задоволни, а притоа да задржите доволно енергија“, советува таа.
3. Пијте доволно течности
Без оглед на ретроградниот Меркур, хидратацијата е секогаш важна, особено за време на топлотните бранови. На повеќето возрасни им се препорачува меѓу 6 и 8 чаши вода дневно. Секогаш имајте шише вода при рака, а помагаат и незасладените чаеви или разредените овошни сокови.
4. Чај наместо телефон пред спиење
Наместо бесконечно скролање на социјалните мрежи пред спиење, испијте шолја чај од камилица или нане. Ваквиот ритуал му помага на телото полесно да се опушти и да се подготви за сон.
5. Спиењето е приоритет
Квалитетниот сон е еден од темелите на доброто здравје. На возрасните им се потребни меѓу 7 и 9 часа сон секоја ноќ. На лицата кои имаат проблеми со заспивањето би можело да им помогне и кивито – некои истражувања сугерираат дека редовната конзумација на ова овошје придонесува за поквалитетен сон.