Руските власти во саботата соопштија дека го повлекле својот амбасадор во Ерменија на консултации, во знак на протест поради сè поблиските односи на земјата со Европската Унија.
Кавкаската држава со околу три милиони жители, која формално е сојузник на Русија, во последните години ги продлабочи врските со Западот, и покрај нејзината економска зависност од Москва.
„Амбасадорот на Руската Федерација во Република Ерменија, Сергеј Копиркин, е повикан во Москва на консултации во врска со чекорите што ги презема ерменското раководство за приближување кон Европската Унија“, се наведува во соопштението на Министерство за надворешни работи на Русија.
Во меѓувреме, Евроазиска економска унија, предводена од Русија, во петокот најави дека ќе ја разгледа можноста за суспензија на Ерменија поради нејзината апликација за членство во Европската Унија.
Според анкетите пред парламентарните избори во јуни, води партијата на проевропскиот премиер Никол Пашинјан, оставајќи ја зад себе проруската опозиција. Како што пренесува Reuters, американскиот претседател Доналд Трамп му дал поддршка на Пашинјан, кој дојде на власт по револуцијата во 2018 година и беше реизбран во 2021 година.
Ерменија смета дека Русија не успеала да ја заштити за време на конфликтот со соседен Азербејџан, со кој долго време беше во спор околу регионот Нагорно-Карабах. Овој регион, кој претходно беше под контрола на ерменските сили и имаше мнозинско ерменско население, беше повторно преземен од Азербејџан во 2023 година.
Од друга страна, Русија тврди дека западните земји се мешаат во внатрешните работи на Ерменија со цел да го ослабат руското влијание на просторот на поранешниот Советски Сојуз.