Економската состојба и развојните политики повторно се тема на политичка пресметка меѓу СДСМ и ВМРО-ДПМНЕ, откако двете партии излегоа со спротивставени оценки за работата на Владата и состојбата во државата.
Од СДСМ ја критикуваат економската политика на власта, оценувајќи дека граѓаните се соочуваат со потешка економска реалност и дека најавите на премиерот Христијан Мицкоски за „маратон“ се порака за долг период на сиромаштија.
„Со други зборови, јасно им кажа дека треба да се подготват долго време да живеат сиромашни“, велат од СДСМ.
Опозициската партија наведува дека до јуни бил потрошен речиси целиот планиран буџетски дефицит за 2026 година, кој изнесува 670 милиони евра, и оценува дека ребалансот ќе биде неизбежен.
Од СДСМ тврдат дека буџетот бил донесен со, како што велат, нереални стапки на раст, а дека кај капиталните инвестиции станувало збор главно за исплата на стари обврски, а не за нови проекти.
Тие додаваат дека економскиот модел сè уште се темели на потрошувачка, наместо на извоз и продуктивни инвестиции, и упатуваат критики за бавното приближување кон Европската Унија.
„Граѓаните не заслужуваат маратон во сиромаштија. Заслужуваат реални реформи, вистински инвестиции и европска иднина“, велат од СДСМ.
На овие критики одговорија од ВМРО-ДПМНЕ, од каде што велат дека резултатите од работата на Владата се видливи и дека земјата се движи напред.
Од владејачката партија оценуваат дека во изминатите две години се реализирани проекти, инвестиции и мерки насочени кон развој и подобрување на животниот стандард.
„Разликата е видлива а резултатите очигледни, Македонија забрзува, Владата на ВМРО-ДПМНЕ испорачува резултати, проекти, инвестиции и развој“, велат од партијата.
ВМРО-ДПМНЕ посочува на, како што наведуваат, историски рекордни 1,255 милијарди евра инвестиции и најсилен инвестициски циклус во поновата историја.
Од партијата информираат и дека Владата работи на реализација на шест нови автопатски делници, а во следната деценија се предвидени 10 милијарди евра капитални инвестиции во патната и железничката инфраструктура.
Во реакцијата се наведуваат и мерките за младите, меѓу кои ваучери за електронски уреди, поддршка за започнување сопствен бизнис, мерки за млади земјоделци и проширување на опфатот на субвенционираниот студентски оброк.
Од ВМРО-ДПМНЕ додаваат дека во изминатиот период се зголемиле платите и пензиите, а економијата бележела раст.
„ВМРО-ДПМНЕ докажа дека знае како да работи за државата и граѓаните. Докажа дека националните интереси немаат цена и дека Македонија може да има власт која не капитулира кога се во прашање достоинството, идентитетот и интересите на народот“, велат од партијата.
Двете најголеми политички партии остануваат со спротивставени ставови за економската состојба и ефектите од владините политики, при што СДСМ предупредува на ризици, а ВМРО-ДПМНЕ инсистира дека земјата е во период на развој и забрзување.