Две државјанки на Македонија се лишени од слобода во Црна Гора, откако се осомничени дека од златарница во Игало украле четири златни ланци, соопшти црногорската полиција.
Според информациите, украдениот накит е пронајден при полициската акција и е вратен на сопствениците на златарницата.
Од Одделението за безбедност во Херцег Нови соопштија дека се уапсени Ж.Ц.Т. (55) и А.Р. (33), државјанки на Северна Македонија, поради сомнение дека сториле кривично дело кражба.
Според истрагата, двете жени на 15 јули, околу 13:30 часот, влегле во златарница во Игало претставувајќи се како заинтересирани купувачи. Тие побарале од вработената да им покаже повеќе парчиња златен накит, а додека таа им ги презентирала производите, наводно го искористиле моментот на невнимание и незабележано земале четири златни ланци од шанкот, кои ги сокриле во своите чанти.
По кражбата ја напуштиле златарницата, но по преземените полициски мерки биле лоцирани и уапсени вчера во стан во Херцег Нови.
Полицијата продолжува со постапката против осомничените, кои ќе одговараат за кривичното дело кражба.