Трет британски државјанин се сомничи дека е заразен со хантавирус по појавата на заразата на туристичкиот брод MV Hondius, соопштија британските власти.
Пациентот моментално се наоѓа на оддалечениот атлантски остров Тристан да Куња, каде што бродот застанал во средината на април.
Двајца други британски државјани веќе биле позитивни на хантавирус. Еден од нив е во стабилна состојба во Холандија, откако бил евакуиран од бродот во средата, додека другиот се наоѓа на интензивна нега во Јужноафриканската Република, каде што бил префрлен минатиот месец, јавува Би-Би-Си.
Досега на бродот се потврдени пет случаи на хантавирус. Властите соопштија дека и едно од трите лица кои починале за време на патувањето било заразено со вирусот.
Бродот MV Hondius се очекува да пристигне овој викенд на Канарските Острови, каде британските власти организирале авион за враќање на британските патници и членови на екипажот во Обединетото Кралство.
Иако ниту еден од преостанатите Британци на бродот во моментот нема симптоми, по враќањето дома ќе им биде наложено самоизолирање.
Британецот Мартин Ансти (56), поранешен полицаец и водич на експедиции на бродот, во средата бил евакуиран во Холандија заедно со 41-годишен холандски член на екипажот и 65-годишен германски државјанин. Тој изјавил за Би-Би-Си дека се чувствува „добро“ и дека неговата состојба е стабилна.
Друг британски патник, 69-годишен маж со потврден случај на хантавирус, бил префрлен на лекување во Јужноафриканската Република кон крајот на април. Според официјалните информации, тој е на интензивна нега, но неговата состојба се подобрува.
Двајца други британски државјани моментално се во самоизолација во Обединетото Кралство по можната изложеност на вирусот. Тие немаат симптоми и доброволно се изолирани.
Тие биле дел од група од 30 лица од 12 различни земји, меѓу кои и седум Британци, кои се симнале од бродот на Света Елена на 24 април, според операторот Oceanwide Expeditions.
Компанијата соопшти дека првиот потврден случај на хантавирус на бродот бил пријавен на 4 мај и дека сите патници кои претходно се симнале се контактирани.
Четворица британски државјани кои се симнале на Света Елена и понатаму се таму. Тие немаат симптоми, но се во постојан контакт со здравствените власти, а медицински тимови се очекува да бидат испратени на островот за дополнителна поддршка.