Филипинскиот Сенат беше ставен под блокада откако во зградата засолниште побара сенаторот Роналд дела Роса, кој се соочува со можна потерница од Меѓународниот кривичен суд (МКС) поради неговата улога во крвавата „војна против дрогата“ на поранешниот претседател Родриго Дутерте.
Во текот на вечерта во средата од зградата на Сенатот во Манила се слушале повеќе истрели, додека вооружени полициски командоси и воени сили влегувале во објектот. Властите соопштија дека нема повредени и дека истрагата за пукањето е во тек.
Дела Роса претходно изјави дека очекува да биде уапсен и ги повика граѓаните да спречат негово предавање на МКС. Според официјалните информации, тој е безбеден и се наоѓа под заштита на безбедносни служби.
Сенаторот, познат по прекарот „Бато“, е обвинет за злосторства против човештвото поради неговата улога како шеф на националната полиција за време на антинаркотичната кампања на Дутерте. Илјадници осомничени дилери и корисници на дрога беа убиени во полициски операции и неразјаснети инциденти во периодот од 2016 до 2022 година.
Поранешниот претседател Родриго Дутерте веќе се наоѓа во Хаг, каде што од март 2025 година е притворен врз основа на потерница на МКС поврзана со убиствата извршени за време на неговото владеење. И Дутерте и дела Роса ги негираат обвиненијата.
Телевизиски снимки прикажаа како специјални полициски единици во борбена опрема го обезбедуваат Сенатот, додека демонстранти пред зградата бараа дела Роса да биде приведен и испратен во Хаг.
Министерот за внатрешни работи Џонвик Ремуља изјави дека безбедносните сили не дошле да го уапсат сенаторот, туку да го заштитат.
„Не сме тука за да го уапсиме сенаторот дела Роса. Напротив, тука сме за да го заштитиме“, изјави Ремуља.
Адвокатите на дела Роса во меѓувреме поднесоа жалба до Врховниот суд со барање да се блокира неговата екстрадиција.
Случајот дополнително ги продлабочува политичките тензии на Филипини, каде што односите меѓу семејствата Дутерте и актуелниот претседател Фердинанд „Бонгбонг“ Маркос значително се влошија во последните две години.
Меѓународниот кривичен суд минатиот месец одлучи дека има надлежност за случајот, иако Филипини се повлекоа од Римскиот статут во 2019 година, бидејќи наводните злосторства биле извршени додека земјата сè уште била членка на судот.