Северна Кореја повторно ќе се отвори за туристи на крајот на годината

Северна Кореја повторно ќе се отвори за туристи на крајот на оваа година, речиси пет години откако целосно ги затвори границите поради пандемијата на Ковид, објавија две туристички компании кои работат со таа земја.

Koryo Tours, со седиште во Пекинг, и KTG Tours, со седиште во Шенјанг, денеска во одвоени изјави рекоа дека на туристичките групи ќе им биде дозволено да го посетат планинскиот град Самџијон, родното место на поранешниот севернокорејски лидер Ким Џонг Ил, пренесува CNN.

Добивме потврда од нашиот локален партнер дека туризмот во Самџихон, а веројатно и во останатиот дел од земјата, официјално ќе продолжи во декември оваа година, соопшти Корио Турс, додавајќи дека маршрутата и дополнителните детали ќе бидат познати „во наредните денови и недели“.

Во посебна објава на Фејсбук, КТГ Турс исто така објави дека ќе бидат потврдени точните датуми на заминување на туристите.

Засега се споменува само Самџихон, но мислиме дека ќе се отвори и Пјонгјанг и други места, велат тие.

Самџихон се наоѓа на кинеската граница и е блиску до највисокиот врв на Корејскиот полуостров, планината Паекту, активен вулкан од големо значење и историско значење за севернокорејците и јужнокорејците, бидејќи се смета за лулка на корејскиот народ.

Градот беше популарна дестинација за кинеските туристи, кои доаѓаа со автобуси пред Ковид, а туризмот и обезбеди приход на Северна Кореја, и покрај меѓународните санкции поради нелегалната нуклеарна и балистичка ракетна програма на Пјонгјанг.

Севернокорејскиот лидер Ким Џонг Ун лично го прегледал градилиштето Самџихон во јули, објавија државните медиуми.