Денеска започнаа градежните активности за изградба на нов паркинг простор во близина на Трговскиот центар во Штип. Просторот каде што претходно беа сместени бездомници е целосно исчистен, откако Општината претходно им обезбеди соодветно домување.
Според градоначалникот Иван Јорданов, во првата фаза од проектот ќе се уредат над 35 паркинг места со павер-елементи, ново осветлување и урбана опрема. За оваа намена од општинскиот буџет се издвоени нешто повеќе од еден милион денари.
Во втората фаза е предвидена изградба на дополнително ниво, со што капацитетот ќе се дуплира на околу 70 паркинг позиции. Јорданов најави дека по овој проект, Општината ќе започне со изградба на катна гаража и зад општинската зграда, со цел дополнително да се намали сообраќајниот метеж во центарот на градот.