По повод 1 Јуни – Меѓународниот ден на децата, Општина Чаир официјално ја отвори манифестацијата „Културно лето на Чаир 2026“, која во текот на јуни ќе понуди низа културни, уметнички и едукативни активности за граѓаните.
Отворањето беше одбележано со дефиле на стотици ученици од основните училишта во Чаир, облечени во народни носии, кои продефилираа низ Старата чаршија до Плоштадот Скендербег, создавајќи празнична атмосфера исполнета со бои и радост во срцето на градот.
Уметничката програма што следуваше им понуди на присутните ора, песни и различни културни настапи од основните училишта и културно-уметничките друштва, претставувајќи ги талентот, креативноста и потенцијалот на младите генерации.
На овој посебен ден посветен на децата, Чаир се претвори во отворена сцена на која беа промовирани културата, традицијата и вредностите што ја градат нашата заедница.
„Деновите на децата“ продолжуваат и во наредните два дена со бројни културни, уметнички и едукативни активности во рамките на програмата на „Културно лето на Чаир 2026“.