Собранието попладнево ја изгласа реконструкцијата на Владата, при што сите предложени кандидати ја добија поддршката од 69 пратеници. За ниту еден од предлозите немаше гласови „против“ или „воздржани“.
За нов министер за правда е избран Јетон Шасивари, додека Агон Ферати ќе раководи со Министерството за односи меѓу заедниците.
Борче Серафимовски е нов министер за земјоделство, шумарство и водостопанство, а Сашо Клековски е избран за министер за здравство.
Ѓоко Велковски ја презема функцијата министер за социјална политика, демографија и млади, додека Иван Стоилковиќ е избран за министер за локална самоуправа.
За министер за култура и туризам е избран Седат Сулејмани, а Ерџан Демир ќе ја извршува функцијата министер без ресор.
Сите кандидати беа избрани со идентичен резултат – 69 гласа „за“, без ниту еден глас „против“ или „воздржан“, со што официјално е завршена реконструкцијата на владиниот кабинет.