Сопственикот на швајцарскиот бар Le Constellation, Жак Морети, денеска во Сион се соочи со прашања од адвокатите кои ги застапуваат семејствата на 41 загинато лице и 115 повредени во катастрофалниот новогодишен пожар во Кранс-Монтана. На сослушувањето пристигна со сопругата Џесика Морети, чие испрашување е закажано за утре. Нејзината адвокатка Јаел Хајат ги опиша овие рочишта како „моменти на вистината“, пренесува Би-Би-Си.
„Целата вистина мора да излезе на виделина“
Во пресрет на сослушувањето, родители на жртвите повторно побараа одговори. Летисија Бродард-Ситре, чиј 16-годишен син Артур загинал во пожарот, изјави за швајцарската телевизија дека сака да дознае што точно тргнало наопаку.
„Важно е целата вистина да излезе на виделина. Доста беа лаги. Сакам секој да преземе одговорност; политиката и партиите не ме интересираат“, изјави таа за СРФ.
Истрага за смрт од небрежност
Против Жак и Џесика Морети се води истрага за смрт од небрежност, нанесување телесни повреди и предизвикување пожар од небрежност. Двајцата се бранат од слобода, а Жак Морети минатиот месец беше пуштен со кауција.
Адвокатката на Џесика Морети за француското радио „Франс Инфо“ изјави дека парот од самиот почеток јасно ставил до знаење дека не се обидува да ја избегне правдата. „Очигледно е дека тие носат одговорност за она што се случило, бидејќи трагедијата се случила во нивниот простор и тие биле задолжени за него. Но истрагата мора да утврди кој точно стои зад оваа трагедија“, рече Хајат.
Безбедносни пропусти под лупа
По пожарот во јавноста излегоа информации за сериозни безбедносни пропусти. Поранешни вработени ја критикуваа управата на барот, а се појавија и снимки на кои се гледа како вработен, неколку недели пред трагедијата, со билијардски стап ја враќа звучноизолациската пена на таванот на место.
Според досегашните сознанија, пожарот најверојатно избувнал кога прскалки на шишиња шампањ го запалиле таванот. Се смета дека токму акустичната пена придонела за брзото ширење на огнот, а таа не била предмет на претходните противпожарни инспекции.
Во барот не била извршена ниту една противпожарна инспекција од 2019 година. Поранешен службеник за безбедност од општината Кранс-Монтана на сослушувањето изјавил дека локалните власти до минатиот месец не затвориле ниту еден објект поради опасност од пожар. Тој навел дека Le Constellation бил контролиран само двапати – во 2018 и 2019 година.
Дополнително, утврдено е дека сервисните врати биле заклучени во моментот кога избувнал пожарот, што спречило многу гости да избегаат додека огнот се ширел околу 1:30 часот на новогодишната ноќ.
Потресни сведоштва на преживеаните
Меѓу жртвите имало бројни тинејџери, а возраста на загинатите се движела од 14 до 39 години. Еден месец по трагедијата, бројот на починати се искачи на 41, откако 18-годишен млад човек им подлегнал на повредите.
Преживеаната Мелани Ван де Велде, која се здобила со изгореници на 40 проценти од телото, во отворено писмо објавено три дена пред сослушувањето го опиша своето страдање. „Моето тело стана бојно поле. Секое преврзување на раните, на секои два дена, е вистинска мака. Секоја постапка ја оживува болката“, напиша таа.
Таа додаде дека нејзиното лице „никогаш повеќе нема да биде исто“ и дека исчезнало лицето што нејзината ќерка го познавала. Запраша и каде е правдата ако одговорноста остане „замаглена, премолчена и разводнета“.
Пред судот во Сион се собраа и други членови на семејствата на жртвите. Лејла Мишелу, чии две ќерки биле повредени во пожарот, изјави дека со своето присуство сака да покаже дека жртвите „не се само имиња на список, туку имаат и свои лица“.
„Одлучив да дојдам поради моите деца, кои се меѓу жртвите“, рече таа.