Советот на јавните обвинители на денешната седница едногласно ја одби иницијативата на јавната обвинителка Ленче Ристоска, во која таа тврдеше дека врз нејзината работа имало надворешни влијанија и политички притисоци поради предмети поврзани со ВМРО-ДПМНЕ.
Според членката на Советот Маријана Илиевска, Комисијата утврдила дека изјавите и нападите на кои се повикува Ристоска не се поврзани со конкретни дејствија што би ја довеле во прашање нејзината самостојност. „Отсуството на индивидуализација ја исклучува можноста да се утврди реално и конкретно влијание“, посочи Илиевска.
Во заклучокот што Советот едногласно го усвои се наведува дека не е утврдено надворешно влијание врз работата на обвинителката, ниту е загрозен нејзиниот професионален интегритет.
На седницата беа донесени и одлуки за распишување огласи за избор на јавни обвинители во повеќе обвинителства во државата, меѓу кои во Ресен, Крива Паланка, Кочани, како и во вишите обвинителства во Битола и Скопје. Седницата продолжи со разгледување дисциплински предмети.