Со високи државни почести претседателот на Собранието Африм Гаши ја пречека неговата колешка, претседателката на албанското Собранието Елиса Спиропали. Во средбата што ја имаа Гаши и Спиропали разговараа за евроинтеграциските процеси, унапредување на меѓусебната соработка, но и реализација на Коридорот 8. Спиропали во своето обраќање на заедничката прес конференција истакна дека Македонија и Албанија имаат заеднички пат кон Европската унија.
„Ние зборуваме албански, бидејќи имаме иста крв и јазик, но и двајцата знаеме како Балканци дека сме, дека овде, во нашиот крај полно со страсти, некако водени од самите себе внатре, а почесто од другите надвор, се случува да се мешаме. Ние веруваме дека ЕУ треба да продолжи да нуди јасен и достапен пат кон членството за двете наши земји, како и за целиот наш регион на Западен Балкан“, вели Елиса Спиропали.
Двете земји на меѓународен план имаат исти цели и интереси, а тоа е да станеме членки на Европската унија и да имаме поголема соработка во НАТО, порача претседателот на Собранието Африм Гаши.
„Искажавме очекување и надеж дека нашите две земји заеднички ќе го продолжат својот пат кон европската интеграција. Сметаме дека тоа е многу важно како за нашите две земји така и за останатите земји од регионот бидејќи заедничка ни е посветеноста за сѐопфатен развој на Западниот Балкан. Укажавме дека проширувањето е една од најдобрите политики на Унијата како геостратешка потреба и е долгорочна инвестиција за цела Европа во политичка, безбедносна и економска смисла“, вели Африм Гаши.
Спиропали потоа имаше средби и со опозицијата, најпрво се сретна со лидерот на ДУИ Али Ахмети, а потоа средба оствари и со претседателот на СДСМ Венко Филипче.