Доналд Трамп му рекол на Владимир Путин дека е клучно да заврши тековната војна на Русија во Украина и дека е подготвен да помогне, пренесе руската новинска агенција ТАСС.
Според Јуриј Ушаков, советник на Путин, за време на телефонскиот разговор во неделата, Трамп исто така го информирал рускиот претседател дека САД се блиску до мировен договор со Иран, додека продолжува војната меѓу САД и Израел против земјата
Разговорот меѓу Трамп и Путин, кој траел околу еден час, Ушаков го опишал како „пријателски и отворен“.
Борбите меѓу Русија и Украина продолжуваат повеќе од четири години, откако Русија ја започна агресијата врз Украина во февруари 2022 година. Војната веќе трае подолго од Првата светска војна, која траела 1.566 дена.
Мировните преговори во голема мера се во застој, но претставници на администрацијата на Трамп неодамна изјавија дека сакаат војната во Украина да заврши „што е можно побрзо“, според висок претставник кој ги информирал новинарите за време на самитот Г7 минатата недела.
За време на разговорот, кој траел 55 минути, Путин на „неформален“ начин му го честитал 80-тиот роденден на Трамп, изјавил Ушаков.
„Почитуван господине претседателе, драг Доналд, од срце Ви го честитам 80-тиот роденден – како толку впечатлива и значајна личност и политичар!“, рекол Путин во честитката објавена на веб-страницата на Кремљ, пренесоа руските агенции.
Во честитката Путин навел дека ја цени „меѓусебната доверба меѓу нас, која ни овозможува отворено и искрено да разговараме дури и за најсложените прашања од билатералната и меѓународната агенда“.
„Убеден сум дека заедно би можеле навистина да им дадеме нов квалитет на руско-американските односи и исто така многу да направиме за безбедноста и стабилноста на светската сцена“, напишал Путин.
Двајцата лидери последен пат се сретнаа во Алјаска во август 2025 година, во обид да постигнат решение за војната меѓу Русија и Украина.