Федерален суд во САД поништи повеќе политики на администрацијата на американскиот претседател Доналд Трамп со кои се блокираше обработката на барањата за имиграција за граѓани на 39 земји опфатени со забраната за патување.
Одлуката ја донесе главниот окружен судија Џон Меконел во државата Род Ајленд, утврдувајќи дека Службата за државјанство и имиграција на САД (USCIS) незаконски ги суспендирала одлуките за барања за азил, работни дозволи, зелени карти и државјанство, објави Ројтерс.
Судијата изјави дека спорните мерки, воведени како дел од политиката на Министерството за внатрешна безбедност на САД, доведоа илјадници имигранти кои ги исполнуваа законските услови и чекаа административни одлуки во правно „лимбо“.
Според пресудата, ограничувањата се однесувале на апликанти од 39 земји во Африка, Азија, Латинска Америка и Блискиот Исток, кои веќе биле опфатени со целосни или делумни забрани за патување.
Судот утврди дека администрацијата ги пречекорила своите овластувања и ги прекршила законите за имиграција и администрација, наведувајќи дека лицата не се нашле во таква ситуација поради сопствените постапки, туку поради нивната земја на потекло.