Администрацијата на американскиот претседател Доналд Трамп го предложила поранешниот унгарски премиер Виктор Орбан за кандидат за функцијата генерален секретар на Организацијата на Обединетите нации (ОН), објавувајќи ја оваа можност како опција за наследник на актуелниот шеф на светската организација, пренесува „Волстрит џурнал“.
Претставници на администрацијата на Трамп веќе контактирале со Орбан за да проверат дали е заинтересиран да влезе во трката за функцијата.
Еден американски претставник првично ја оценил идејата како невообичаена, додека извори цитирани од „Волстрит џурнал“ проценуваат дека Орбан би можел да обезбеди поддршка од најмалку осум членки на Советот за безбедност на ОН, со можност бројот на гласови да достигне десет од вкупно 15 членки.
Сепак, останува нејасно дали Франција и Велика Британија би ја поддржале неговата кандидатура или би го искористиле правото на вето што го имаат како постојани членки на Советот за безбедност.
Орбан, кој со години ја предводеше унгарската влада, е познат по своите ставови против имиграцијата, судирите со Европската Унија и националистичките политики. Тој одржува блиски односи со американскиот претседател Доналд Трамп, кој го поддржа за време на последната изборна кампања во Унгарија.
Според медиумските извештаи, поранешниот унгарски премиер позитивно ја примил можноста, но има одредени резерви и не сака да влезе во трката без да биде сигурен во своите шанси за освојување на функцијата.
Во меѓувреме, дипломатката на Обединетите Арапски Емирати, Лана Нусеибех, ја објави својата кандидатура за челната позиција во ОН.
Трката се одвива во рамки на подготовките за избор на наследник на актуелниот генерален секретар Антонио Гутереш, чиј мандат завршува на 31 декември.