Американскиот претседател Доналд Трамп, повторно го шокираше светот. Објави 90 дневен мораториум на царините за повеќето земји освен за Кина, за која ги зголеми царините на 125%.
Трамп вчера објави дека сите земји кои не возвратија на американските царини ќе добијат одложување – до јули и ќе се соочат само со сеопфатна американска царина од 10 проценти.
„Мислам дека тоа е многу позитивно за светот и за нас. Ние не сакаме да им наштетиме на земјите кои не треба да бидат повредени. И сите тие сакаат да преговараат“, вели Доналд Трамп.
Повеќе од 75 земји ја контактирале американската федерална влада за да преговараат за решение. Додека пак Пекинг возврати со 84% царини за увоз од САД.
Берзите пораснаа веднаш по веста за мораториум од 90 дена. По неколкудневниот пад, индексот Дау Џонс порасна за речиси 8%, а индексот Насдак забележа раст од над 12%, најголем од 2001 година. Растеа индексите на европските и светските берзи.
Претседателката на Европската комисија Урсула фон дер Лајен ја поздрави одлуката на Трамп- рече дека е важен чекор кон стабилизирање на глобалната економија. Во мирување од 90 дена се и контра-царините на ЕУ за увозот на американски производи.
Премиерот Мицкоски информираше дека вчера разговарал со американскиот секретар за економија, Хауард Лутник.
„Ја нагласив важноста на американската поддршка за стабилен и просперитетен Балкан, а посебно за прашањата кои се од витално значење за економската соработка. Се согласивме да продолжиме да го развиваме стратешкото и економско партнерство помеѓу двете земји“, порача Христијан Мицкоски.
Министерката за финансии Кочоска претходно најави дека сме подготвени да ги намалиме царините со САД дури и на нула проценти. А, ќе се работи и на потпишување на договор за слободна трговија.
За универзитетската професорка Никица Мојсоска Блажевски, тоа е гест на пријателство. Во емисијата Бизнис 21 таа препорача дека мора повеќе да се подготвиме за стратешкиот дијалог со САД за да ги зацврстиме нашите позиции и да истапиме со барања.
„Нашиот извоз кон Америка е релативно мал 1,5 отсто од вкупниот наш извоз. Увозот од Америка е 1,3 % од вкупниот увоз. Така што Америка не е наш значаен трговски партнер и мислам дека намалување на царините на 0 % би било еден гест на добра волја или пријателски однос“, вели Никица Мојсоска Блажевски.
И додека светот се созема од неколкудневниот шок, мнозинството демократи во американскиот Конгрес, како и играчи на пазарот, аналитичари и новинари, се сомневаат- дека Трамп незаконски учествувал во најголемата пазарна манипулација во светот. Дали соработниците на Трамп незаконски профитираат од огромните промени на берзата преку инсајдерски тргување?- прашуваат тие и повикуваат на конгресна истрага.