Доналд Трамп повторно ја заостри реториката кон Иран, предупредувајќи на екстремни последици доколку Техеран изврши напади врз американски бродови во Персискиот Залив.
Во интервју за Fox News, Трамп изјави дека Иран „ќе исчезне од лицето на земјата“ ако се осмели да ги нападне американските бродови кои ги придружуваат поморските транспорти во регионот.
Оваа изјава доаѓа по неговите тврдења дека слободното движење на бродовите во Персискиот Залив е обезбедено со помош на американската морнарица и индиректен договор со Иран — тврдење кое веднаш беше демантирано од Техеран.
Сепак, Трамп истакна дека Иран покажал „поголема флексибилност“ во мировните преговори, оставајќи простор за, како што навести, дипломатски развој зад сцената.
Од друга страна, тој ја нагласи засилената американска воена присутност во регионот, велејќи дека САД значително ги зголемиле своите воени капацитети.
„Имаме повеќе оружје и муниција од кога било досега, со најдобра воена опрема и бази во светот. Можеме да ги употребиме и ќе ги употребиме ако е потребно“, изјави тој.