Претседателот на Соединетите Американски Држави, Доналд Трамп, изјави дека Русија мора да постигне договор за прекин на четиригодишната војна во Украина.
Трамп рече дека имал „многу добар“ состанок со украинскиот претседател Володимир Зеленски и најави дека двајцата лидери ќе се сретнат повторно подоцна во текот на денот.
Зборувајќи со новинарите во Франција каде што се одржува самитот на Г7, Трамп ја нагласи потребата од постигнување договор меѓу Русија и Украина за прекин на конфликтот.
„Русија треба да склучи договор. Тие изгубија неверојатен број луѓе, како и Украина. Само минатиот месец, двете страни изгубија околу 35.000 војници. Во просек, загубите изнесуваат 25.000 луѓе месечно, претежно млади војници“, рече Трамп.
Американскиот претседател додаде дека разговорите се во тек и дека во неделата имал и телефонски разговор со рускиот претседател Владимир Путин.
Според Трамп, односите меѓу лидерите на Русија и Украина остануваат напнати.
„Постојат многу несогласувања и незадоволства меѓу двајцата лидери“, додаде тој, алудирајќи дека предизвиците за постигнување договор остануваат големи.
Втората средба меѓу Трамп и Зеленски се очекува да се одржи подоцна во текот на денот.