Најмалку едно лице загина, а 39 други се повредени, некои сериозно, во сериозна трамвајска несреќа во Милано. Несреќата се случила околу 16 часот денес кога трамвај излетал од шините на Виа Виторио Венето во северниот дел од градот, јавува Би-Би-Си.
Според првичните извештаи, преполн трамвај удрил во страната на зграда. Се верува дека починатиот е пешак, додека повеќето од повредените се патници во возилото. Бројни служби за итни случаи пристигнале на местото на настанот, а има и извештаи за луѓе заробени во урнатините. Службениците за цивилна заштита поставиле шатор за да им пружат помош на повредените.
Патниците опишаа дека слушнале бучава под трамвајот непосредно пред несреќата, по што возилото скршнало, забрзало и се удрило во зградата.
„Мислев дека е земјотрес. Седев и одеднаш паднав на подот, како и другите патници“, изјави еден човек за новинската агенција Анса. „Беше ужасно.“
„Само што слушнав силен тресок“, изјави 27-годишната Ана за АФП од блиската канцеларија. „Видов како дел од трамвајот влегува во продавницата“.
Сè уште не е јасно што предизвикало трамвајот да излета од шините, но медиумите шпекулираат дека возилото можеби пребрзо влегло во остра кривина.