Цените на нафтата продолжија да растат во вторник, надминувајќи 110 долари за барел откако американскиот претседател Доналд Трамп му даде ултиматум на Иран повторно да го отвори Ормутскиот теснец или да се соочи со напади врз клучната енергетска инфраструктура. Поради ескалацијата на конфликтот на Блискиот Исток, Меѓународниот монетарен фонд (ММФ) веќе предупреди на забавување на глобалниот раст и повисока инфлација, пренесува „Гардијан“.
Трамп му се закани на Техеран дека Иран ќе доживее „пекол“ ако не го исполни неговото барање до 20 часот по источно-американско време (1 часот по средноевропско време во среда) и не го отвори теснецот.
Трамп најави напади врз иранските електрани и мостови. Техеран го отфрли предлогот за прекин на огнот и инсистира на траен крај на војната.
Цената на суровата нафта „Брент“ порасна за 1,1 процент на 111,01 долари за барел, додека американската сурова нафта од Западен Тексас (WTI) порасна за 2,6 проценти на 115,30 долари. Тековниот конфликт, кој ескалираше откако САД ја започнаа операцијата „Епски бес“ на 28 февруари, предизвика најлошото нарушување на глобалните резерви на енергија досега. Блокадата на Ормутскиот теснец од страна на Иран, низ кој нормално поминува една петтина од светската нафта и гас, го запре производството на милиони барели нафта. Дури и ако конфликтот се реши брзо, ММФ ќе ја намали својата прогноза за раст и ќе ги зголеми очекувањата за инфлација, изјави за Ројтерс директорката на ММФ Кристалина Георгиева.