Хрватската полиција утрово изврши претрес во куќата на министерот за градежништво, Дарко Хорват во Меѓимурје, поради основани сомненија за злоупотреба на службената положба. Министерот Хорват бил уапсен и ќе биде однесен на распит во обвинителството.
Како што неофицијално пренесуваат хрватските медиуми, министерот е уапсен поради повеќе дејствија. Истражителите ја проверуваат улогата на Министерот во злоупотребите во кои е осомничена неговата помошничка Ана Мандац.
Покрај Хорват, на мета на истрагата се уште и поранешниот министер Томислав Толушиќ како и Борис Милошевиќ. Според достапните информации, се под сомневање за вработување со врски и доделување на тендери.
Во меѓувреме се обрати и премиерот Андреј Пленковиќ.
„Колку јас разбирам, министерот е уапсен поради случувања во 2018 година. Тогаш беше министер за економија. Но, индикативен е тајмингот на ова апсење. Барам објаснување зошто толку се брзаше околу приведувањето“, рече Пленковиќ.