Службата за безбедност на Украина (СБУ) уапси 18-годишник во Киев, осомничен за соработка со руската Федерална служба за безбедност (ФСБ). Според истражителите, 18-годишникот се обидел да регистрира 148 терминали „Старлинк“ (Starlink) наменети за руските сили.
Од СБУ соопштија дека терминалите требало да се користат за планирање руски воени операции во регионите Доњецк и Запорожје. Украинските безбедносни служби тврдат дека спречиле активирање на уредите.
Истрагата открила дека осомничениот е поранешен ученик во стручно училиште во Киев, каде што се обучувал за заварувач. По завршувањето на школувањето, почнал да бара начини за брза заработка преку канали на „Телеграм“. Наводно, со него стапил во контакт оперативец на ФСБ, кој му понудил пари во замена за соработка.
Уапсен во близина на пошта
Само неколку дена по регрутирањето, осомничениот регистрирал 15 терминали „Старлинк“ користејќи податоци од пасоши на роднини и познаници. Потоа собирал лични податоци од други лица за да регистрира дополнителни 133 уреди.
Агентите на СБУ го уапсиле во близина на пошта, каде што наводно планирал да активира нова серија терминали. Блокирани биле и претходно регистрираните 15 терминали, чии податоци осомничениот веќе му ги испратил на својот руски контакт преку апликација за пораки.
Осомничениот моментално е во притвор и му е одбиена можноста за кауција. Доколку биде прогласен за виновен, му се заканува доживотен затвор и конфискација на имотот.
Сè почести случаи на руско регрутирање украински граѓани
Овој случај е дел од сè поголемиот број инциденти во кои, според украинските власти, Русија регрутира украински граѓани за извршување задачи за Москва. Пред два дена, украинските власти уапсија 19-годишник осомничен за планирање бомбашки напад врз автобус со војници во Ривне. Според СБУ, и тој осомничен бил регрутиран преку канали на „Телеграм“ што нуделе брза заработка.
Минатиот вторник, СБУ објави дека уапсила осомничен соработник во Киев, кој наводно ѝ помагал на Русија да постави репетиторски станици за своите беспилотни летала и да собира разузнавачки податоци за цели во главниот град. Во август, СБУ во регионот Харков уапси лице осомничено за соработка со Русија, кое наводно регистрирало 27 терминали „Старлинк“ за руските сили.