Оштетените улици во Визбегово остануваат долгогодишен предизвик за жителите и бизнисите во оваа скопска населба, кои секојдневно се соочуваат со запоставена инфраструктура.
„Населбата Визбегово се наоѓа само неколку километри од центарот на Скопје, но речиси сите улици се неасфалтирани. Она што може да се забележи зад мене е дека и неколку паркирани возила се покриени со прашина“, вели репортерката на ТВ21.
Прашината во лето, калта во дождливите денови и бројните оштетувања на возилата станаа секојдневие за возачите.
Го контактиравме градоначалникот на Општина Бутел, Дарко Костовски, кој кратко одговори:
„Има многу нерешени прашања, сега се решаваат како никогаш досега. Полека, сè ќе биде направено“, вели Дарко Костовски.
Освен улиците во населбата, и улицата „Хасан Приштина“, позната како „Качанички пат“, една од најфреквентните сообраќајници што ја поврзува Македонија со Косово, продолжува да се соочува со големи инфраструктурни проблеми. Бројните дупки и оштетените делови од асфалтот го отежнуваат движењето на возилата, предизвикувајќи долги колони и незадоволство кај граѓаните и бизнисите што секојдневно поминуваат по оваа делница.
Од Град Скопје велат дека ставиле голем фокус на сообраќајниот јазол кај Момин Поток, како и на делницата до крстосницата со булеварот „Словенија“. Како што додаваат, динамиката на работите во овој дел е значително забрзана и овој проект претставува големо олеснување на сообраќајот од тој дел на градот.
„Паралелно се завршува комплетирањето на документацијата за булеварите „Цветан Димов“ и „Косовска бригада“, при што е предвидено нивно проширување и трајно решавање на сообраќајниот хаос. По завршувањето на овие проекти се разгледува можноста за целосна реконструкција на патот во Визбегово, во близина на индустриската зона“, вели Град Скопје.
Инаку, пред неколку месеци бизнисмените од најголемата економска зона во државата, Визбегово, побараа ново асфалтирање на овој пат. Според нив, на оваа улица функционираат повеќе од 100 компании, кои вработуваат околу 8.000 лица, а нивната дејност носи околу 600 милиони евра годишен промет и 40 милиони евра добивка, што претставува 7,5 проценти од Бруто домашниот производ.