Силното невреме предизвика поплави во Пиран и Порторож, а кај Хрватини беше снимен и атмосферски вртлог кој за кратко време се формирал, но не прераснал во торнадо. Во поголем дел од Словенија има врнежи и грмежи, додека на Приморско пожарникарите интервенирале на околу 50 локации.
На словенечкото крајбрежје силните врнежи започнале околу 9 часот наутро. Според Агенцијата за животна средина на Словенија (АРСО), на одделни подрачја во Истра во периодот од 9 до 11 часот биле измерени речиси 65 милиметри дожд.
Најтешка е состојбата во Пиран, каде водата поплавила повеќе простории, угостителски објекти, како и плоштадот Тартини.
Претставничката на општина Пиран за односи со јавноста, Весна Пинтер Стојниќ, изјавила дека се совпаднале неколку неповолни околности – обилниот дожд и високото ниво на морето.
„За време на најсилниот дожд, токму тогаш се излеваше и морето, конкретно на плоштадот Тартини, покрај плажата во Порторож и во Луција. Ниту испумпувањето не помогна, бидејќи нивото на морето беше повисоко, па водата се измеша со атмосферската“, изјавила таа за СТА.
Поради високото ниво на морето и силниот јужен ветер, водата и понатаму го поплавува градот од двете страни. Дел од жителите изјавиле дека поради поплавите не успеале да стигнат на работа во Пиран.
Надлежните служби се обидуваат да ги ублажат последиците, но истовремено се подготвуваат и за ново влошување на времето во текот на попладневните часови.
„Повеќе од утврдување на штетата, сега е време да се подготвиме за попладневното поплавување, односно поројниот дожд“, предупредила Пинтер Стојниќ.
Таа додала дека во вакви екстремни услови ниту вреќите со песок не се доволни за да го спречат надоаѓањето на водата.
Снимен вртлог кај Хрватини
Во близина на Хрватини во Словенечка Истра бил снимен и вртлог, кој според АРСО брзо се распаднал и не прераснал во торнадо.
„Не биле исполнети сите услови за формирање торнадо кое би продолжило да се движи, па вртлогот кој јасно се гледа на снимката брзо се распаднал“, соопштиле од АРСО.
Во меѓувреме, пожарникарите имале полни раце работа низ целото крајбрежје. Според противпожарната бригада од Копер, интервенирале на околу 50 локации, а на терен биле ангажирани околу 60 пожарникари со 14 возила.
Во Копер и Пиран биле отстранувани паднати и оштетени дрвја, додека во Копер пожарникарите испумпувале вода од објекти.
Екипите остануваат во висока готовност поради најавеното попладневно влошување на времето. За западна, централна и јужна Словенија се очекуваат околу 100 милиметри дожд, а локално, при подолготрајни поројни врнежи, и повеќе.
Поради опасноста од невремето, за поголем дел од Словенија е издадено портокалово метео-предупредување.
Невремето има последици и врз сообраќајот. Патувањето од Копер до Љубљана во моментов трае речиси три часа.