Продолжуваат обвинувањата на Коалицијата ВЛЕН за, како што велат, манипулации со цената за изградба на салата на Општинскиот совет во Гостивар. Според нив, поранешниот градоначалник Арбен Таравари и поранешниот вршител на должноста Валбон Лимани го злоупотребиле општинскиот буџет.
-Салата на Општинскиот совет, која технички и функционално можела да се изгради со максимален трошок од 50 илјади евра, е изградена со скандалозна цена од околу 750 илјади евра. Ова не е грешка. Не е интерпретација. Не е политичка дебата. Ова е тешка злоупотреба на јавните пари. Документот постои. Сумата постои. И документот е потпишан од Арбен Таравари, велат од ВЛЕН.
Кандидатот на НАИ за градоначалник на Гостивар, Валбон Лимани, ги отфрла обвинувањата на противкандидат Невзат Бејта и на коалицијата ВЛЕН. Синоќа во емисијата „Click Plus“, тој појасни дека проектот ќе чини околу 530 илјади евра и дека не станува збор само за изградба на салата на Советот, туку за реновирање на целиот приземен кат.
– Колку што имам информации, проектот е некаде околу 530 илјади евра со договор и не станува збор само за салата на Советот, туку за приземниот кат, вели Валбон Лимани, кандидат на АКА за Гостивар.
– Вклучува и информативен центар и нов центар кој ќе им служи на граѓаните, со тоалети и други дополнителни елементи, вклучително и изолација. Не станува збор само за сала со електронско гласање. Не сакам да навлегувам во детали, граѓаните најдобро ќе разберат и на 11 јануари ќе го дадат својот одговор, вели Валбон Лимани, кандидат на АКА за Гостивар.
Лимани ги отфрли и обвинувањата на неговиот противкандидат дека долгот на општината изнесува 30 милиони евра. Според него, реалниот долг на Општина Гостивар е од 9 до 9,5 милиони евра.
Лимани очекува поддршка и од АШ на Зијадин Села, со која, како што рече, заеднички реализираат активности. Во однос на резултатот од повторените избори на 11 јануари, Лимани изрази уверување дека нема да има промена на резултатот.