ВЛЕН го поздравува „најновото откритие“ на Демократската унија за интеграција во врска со Коридорот 8, за кое велат дека, иако со задоцнување, го потврдува она што тие континуирано го кажуваат и докажуваат, односно дека овој проект не може да се запре и не е ничија сопственост.
„По долг период на контрадикторни изјави и обиди за создавање политичка магла, охрабрувачки е да се види дека опозицијата конечно рефлектира и се приближува кон ставовите што ВЛЕН доследно и одговорно ги застапува институционално.
ВЛЕН потсетува дека нашата посветеност за реализација на Коридорот 8 е јасна уште од првиот ден: станува збор за стратешки проект кој ја поврзува државата со регионот и со Европска Унија, и кој мора да се реализира врз професионални, транспарентни и одржливи основи.
Јасно е дека деструктивната реторика и обидите за политизација на овој проект не донесоа ништо освен конфузија. Затоа, секој чекор кон порационална и поодговорна комуникација е добредојден, дури и кога доаѓа со задоцнување.
ВЛЕН останува цврсто посветен Коридорот 8 да се реализира како модерен, европски проект во служба на граѓаните, кој ќе обезбеди економски развој, посилни регионални врски и одржлива перспектива за државата“, велат од ВЛЕН.